Ким Чен Иннинг саломатлиги жойида — Жанубий Корея разведкаси
КХДР етакчиси неча килограмм вазн йўқотгани маълум бўлди.
Ким Чен Ин 20 киллограм вазн йўқотган, аммо унинг саломатлигига жиддий хавф мавжуд эмас. Бу ҳақда Жанубий Корея разведкаси маълумотларига таяниб, “Рёнхап” агентлиги хабар берди.
Агентликка кўра, Жануб разведкаси парламентнинг ёпиқ мажлисида Ким Чен Ин ўрнига унинг қиёфадоши иштирок этаётганини рад этди. Шимолий Корея етакчиси вазн йўқотган. Бунга қадар унинг оғирлиги 140 килограмм атрофида бўлган.
Бундан аввал АҚШнинг қатор ОАВларида Ким Чен Ин шу йилнинг ёзида ҳокимиятдан четлатилгани, унинг ўрнида давлат тадбирларида қиёфадоши иштирок этаётгани тўғрисида хабарлар тарқалган эди. Аммо “Рёнхап” маълумотларига кўра, Жанубий Корея разведкаси “сунъий интеллект ҳамда бошқа илмий методлар” ёрдамида Шимол етакчиси саломатлиги ҳолатини таҳлил қилган ва юқоридаги маълумотларни тақдим этган.
Бундан аввал КХДР баллистик ракета синовини ўтказгани ҳамда Ким Чен Ин Жанубий Корея ва АҚШни кескин танқид қилгани ҳақида хабар берилганди.
Жаҳонгир Қўзиев
