Лутфихоним Саримсоқованинг хотира кечаси бўлиб ўтди

Ўзбекистон Миллий кино санъати саройида ўзбек театри ва киносининг йирик вакили, Ўзбекистон халқ артисти Лутфихоним Саримсоқованинг таваллудининг 130 йиллигига бағишланган хотира кечаси бўлиб ўтди.

 

Тадбирда Ўзбекистон Республикаси Маданият вазирлиги ҳузуридаги Кинематография агентлиги директори Шуҳрат Ризаев, Ўзбекистон Фанлар академияси вице-президенти Шаҳло Турдикулова, театршунос олима, санъатшунослик фанлари доктори, профессор Марфуа Ҳамидова, Ўзбекистонда хизмат кўрсатган маданият ходими, машҳур кинорежиссёр Қамара Камалова, санъатшунослик фанлари доктори, профессор Нигора Каримова, таниқли олимлар, санъат ва кино арбоблари, профессорлар ҳамда оммавий ахборот воситалари вакиллари иштирок этдилар.

 

Кечада Лутфихоним Саримсоқованинг бой ижодий мероси, ҳаёти ва санъатдаги ўрни ҳақидаги ҳужжатли фильмлар намойиш этилди. Шунингдек, “ART Hause Hamsa” театр студияси томонидан актрисанинг ҳаёти ва даврини акс эттирувчи куй-қўшиқ ва рақслар жонли ижрода тақдим қилинди.

 

Лутфихоним Саримсоқова — лирика ва эпик образларни, меҳрибон оналар, қаҳрамон ва салбий қаҳрамонларни бетакрор ифода эта олган, халқ юрагида ўчмас из қолдирган санъаткор сифатида ёдда қолган.

 

Унинг "Қасам", “Маҳаллада дув-дув гап”, “Сен етим эмассан” каби фильмлардаги роллари, “Аршин мол алин”, “Фарҳод ва Ширин”, “Маликаи Турандот” каби саҳна асарларидаги образлари бугунги кунда ҳам томошабинлар ёдидан чиқмаган.