Yangi Konstitutsiyaga muvofiq mahalliy Kengash raisi va hokim lavozimlarining bir-biridan ajratilishi ularning vakolatlarini qayta ko‘rib chiqishni talab etdi. Shu asosda davlat va jamiyat boshqaruvidagi rolni kuchaytirish maqsadida qator qonun hujjatlariga o‘zgartirish va qo‘shimchalar kiritilmoqda.
Xususan, “Ichimlik suvi ta’minoti va oqova suvlarni chiqarib yuborish to‘g‘risida”gi Qonun yangilandi. Endilikda mahalliy davlat hokimiyati vakillik organlari ichimlik suvi va oqova tizimini rivojlantirishga qaratilgan hududiy dasturlarni tasdiqlash vakolatiga ega bo‘ldi.
Shuningdek, Qoraqalpog‘iston Respublikasi Jo‘qorg‘i Kengashi, viloyatlar va Toshkent shahar xalq deputatlari Kengashlari ichimlik suvi ta’minoti hamda oqova suv xizmatlari uchun tariflarni belgilaydi. Bu esa hududiy ehtiyojlardan kelib chiqqan holda qarorlar qabul qilish imkonini kengaytiradi.
Mahalliy ijro etuvchi hokimiyat organlari esa ushbu sohada davlat siyosatini amalga oshirishda ishtirok etadi, hududiy dasturlarni ishlab chiqadi va ularning bajarilishini ta’minlaydi. Bundan tashqari, xususiy sektorni jalb etish va loyihalar ijrosini monitoring qilish ham ularning vazifalari qatoriga kiritilgan. Mutaxassislar ushbu o‘zgarishlar ichimlik suvi bilan ta’minlash bo‘yicha hududiy loyihalarga investitsiyalarni yanada samarali jalb etishga xizmat qilishini kutmoqda.