Малида аёл блогер қатл этилди
TikTok блогери Мариам Сиссе ўзларини “жиҳодчилар” деб атаган гуруҳ томонидан ўлдирилган.
Мали шимолида ижтимоий тармоқдаги фаолияти туфайли ёш аёл шафқатсизларча қатл этилди.
SCMP’га таяниб хабар берилишича, Тонка шаҳрида TikTok'да 90 000 дан ортиқ обуначиси бўлган Мариам Сиссе ўзларини “жиҳодчилар” деб атаган гуруҳ томонидан ўғирлаб кетилган ва қатл этилган.
Ўлдирилган блогернинг оиласи ва маҳаллий ҳокимият вакиллари воқеанинг ростлигини тасдиқлаган. Маълумотларга кўра, Мариам Сиссе ўз ҳудудида содир бўлаётган воқеаларни тасвирга олиб, видеоларни ижтимоий тармоқларда баҳам кўрган.
Шунингдек, унинг TikTok постлари орқали “Мали армиясига маълумот узатишда” айблангани сабабли қатл этилгани тахмин қилинмоқда. Ҳодиса мамлакатда блогерлар ва ижтимоий тармоқлар фаолиятининг хавфсизлиги масаласини яна бир бор жиддий кўрсатмоқда.
