Мессининг отаси "Барселона" клуби билан боғланди
Лионел Месси "ПСЖ"дан "Барселона"га қайтиши мумкин.
Аргентиналик 34 ёшли футболчининг отаси Хорхе бир неча кун олдин каталонияликлар раҳбарияти билан боғланган. Бу Леонинг клубга қайтиши эҳтимолини кўриб чиқиш учун қилинган, — деб хабар беради каталониялик инсайдер Жерар Ромеро.
Месси 2000 йилдан 2021 йилгача "кўканорранглилар" тизимида ўйнаган. У ўтган ёзда шартномаси тугаганидан кейин эркин агент сифатида "ПСЖ" сафига қўшилган эди.
Парижликлар шу ҳафта Чемпионлар Лигасининг 1/8 финалида "Реал"га (1:3) ютқазиб турнирни тарк этишди.
Маълумот учун: аввалроқ ҳужумчи "ПСЖ"ни тарк этиш ниятида эмаслиги, у бор эътиборини ЖЧ-2022га қаратгани, Францияга мослашиб қолгани хабар қилинганди.
Месси Париж клуби сафида 26та ўйинда 7та гол урди ва 11та голли узатмани амалга оширди.
Эслатиб ўтамиз, аввалроқ, Килиан Мбаппе "Реал" билан шартнома имзолагани ҳақида хабар берилганди.
