Qotillikni sodir etgan shaxs marhumlarga qarindosh bo‘lgan. Qaynaka o‘g‘li bilan ukasining xotini va 17, 14 yoshli jiyanlarini pichoqlab o‘ldirgan. Muammoga yer talashish sabab bo‘lgan.
Bosh prokuratura axborot xizmati rahbari Hayot Shamsutdinovga ko‘ra, voqea 9 avgust kuni soat 21:40 larda sodir bo‘lgan.
Pop tumanining “Boyon” MFY, Boyon-3 ko‘chasida yashovchi fuqaro M.A. ismli ayol qarindoshining yashash xonadoniga borib, avvaldan mavjud bo‘lgan mulkiy nizo sabab u bilan janjallashib qolgan. M.R. ayol qarindoshi va uning ikki nafar voyaga yetmagan farzandini pichoq bilan qasddan urib o‘ldirib, voqea joyidan yashiringan, deyiladi masʼullar izohida.
Hozirda mazkur holat yuzasidan 2024 yilning 10 avgust kuni Jinoyat kodeksining 97-moddasi (qasddan odam o‘ldirish) bilan jinoyat ishi qo‘zg‘atilgan. Tergov harakatlari olib borilmoqda.