ОАВ: Эрон–Исроил ўртасида янги уруш эҳтимоли кучаймоқда
Теҳрон ҳужум содир бўлса, бир вақтда 2 минг ракета учириш билан жавоб беришини таъкидлади.
The New York Times ёзишича, Эрон ва Исроил ўртасида ҳарбий тўқнашув эҳтимоли кескин ортиб бормоқда. Нашрнинг таъкидлашича, Эронга нисбатан қатъий санкцияларнинг қайта жорий этилиши ва Теҳроннинг ядро дастури бўйича музокараларнинг тўхтаб қолиши минтақада вазиятни янада кескинлаштирган.
Маълумотларга кўра, Эрон расмийлари бойитилган уран заҳиралари олдинги ҳужумларда зарар кўрганини билдирган. Бироқ Исроил ушбу материаллар хавфсиз жойга кўчирилганини тахмин қилмоқда. Шу билан бирга, Эроннинг уран бойитиш бўйича янги объект қурилаётганига оид тахминлар ҳам кучайган.
Мутахассисларнинг қайд этишича, ҳозирги нотинч вазият минтақада хавфли тарангликни юзага келтирмоқда. Исроил узоқ йиллардан буён Эроннинг ядро дастурини ўз миллий хавфсизлиги учун таҳдид деб ҳисоблаб келади. Форс кўрфазидаги айрим давлатлар эса вазият Исроил томонидан Эрон ҳудудига янги ҳарбий зарба берилишига деярли асос яратганини таъкидламоқда.
Эрон томони огоҳлантиришича, агар Исроил томонидан ҳарбий ҳужум амалга оширилса, Теҳрон кескин жавоб қайтаради ва бир вақтнинг ўзида 2 мингта ракета учирилиши мумкинлигини маълум қилган. Халқаро Инқироз Гуруҳи Эрон бўйича лойиҳалар директори Али Воезнинг сўзларига кўра, мамлакатдаги ракета заводлари кечаю-кундуз иш олиб бормоқда.
