Олий Мажлисда электр энергияси тарифлари бўйича тушунтириш берилди
Аҳолининг 70 фоизи ойига 300 кВт/соатгача электр энергияси истеъмол қилади.
Бугун Тошкент шаҳрида Олий Мажлис Қонунчилик палатасининг навбатдаги йиғилиши бўлиб ўтди. Мажлисда Бош вазир ўринбосари — Иқтисодий тараққиёт ва камбағалликни қисқартириш вазири Жамшид Қўчқоров давлат бюджети ижроси юзасидан ахборот берди ҳамда электр энергияси тарифларидаги ўзгаришлар бўйича тушунтириш берди.
Тарифлар қандай ўзгарди?
Жамшид Қўчқоровнинг таъкидлашича, Ўзбекистонда 7,6 миллионта электр энергияси истеъмолчиси мавжуд бўлиб, уларнинг 70 фоизи ойига 300 кВт/соатгача электр энергияси истеъмол қилади.
“Тарифлар оширилишида ҳеч қандай жиддий муаммо кўрмаяпмиз. Агар бир оила ойига 300 кВт/соат ток ишлатса, тўлов миқдори аввалгидан 20 минг сўмга кўпаяди — 180 минг сўмдан 200 минг сўмга,” — деди Қўчқоров.
У шунингдек, таққослаш учун, республикада ҳар бир мобил алоқа абоненти ўртача 35 минг сўм тўлаётганини, аксар оилаларда эса учта телефон борлигини эслатди.
Тарифлар тафсилоти:
200 кВт/соатгача: нарх 450 сўмдан 600 сўмга оширилди.
Бу ҳажмдаги истеъмолчилар ўртача 30 минг сўм кўпроқ тўлайди.
201–500 кВт/соат оралиғи: нарх 900 сўмдан 800 сўмга пасайтирилди.
Қўчқоровнинг ҳисоб-китобларига кўра, агар оила ойига 500 кВт/соат ток ишлатса, умумий харажат ўзгармайди — олдин ҳам, ҳозир ҳам 360 минг сўм атрофида тўланади.
Шунингдек, вазир ойига 1000 кВт/соат ва ундан ортиқ электр ишлатадиган хонадонлар мамлакатда кам эканини қайд этди.
Ҳукумат вакилининг айтишича, энергия нархи оширилишига қарамай, ижтимоий ёрдам тизими ҳамда ҳимоя чоралар кўзда тутилган.
