Ozarbayjon Prezidenti Ilhom Aliyev 5 yanvar kuni mahalliy telekanallarga bergan intervyusida mamlakatining Markaziy Osiyo bilan G‘arb o‘rtasidagi aloqadagi rolini taʼkidladi. Prezidentning so‘zlariga ko‘ra, bugungi kunda Markaziy Osiyo va Ozarbayjon integratsiyasi, shuningdek C5 mintaqasining C6 yo‘nalishiga aylanishi, nafaqat mintaqa, balki butun dunyo uchun muhim ahamiyatga ega.
“Transport, logistika va aloqa yo‘nalishlari ko‘plab yetakchi xalqaro aktyorlar uchun markaziy ahamiyat kasb etadi. Shu nuqtai nazardan, Markaziy Osiyoni G‘arb bilan bog‘lashga qodir yagona ishonchli mamlakat Ozarbayjondir”, – dedi Ilhom Aliyev.
Prezident shuningdek, geografik jihatdan boshqa yo‘nalishlardan foydalanish mumkinligini tan olgan, biroq hozirgi geosiyosiy vaziyatni hisobga olgan holda, G‘arb uchun muqobil yo‘nalishlarni maqbul deb hisoblash qiyinligini qayd etdi. Shu sababli, Ozarbayjonning tirik ko‘prik va ishonchli sherik sifatidagi roli ortib borayotgani, yirik loyihalarni amalga oshirish salohiyatini amalda ko‘rsatib kelayotgani taʼkidlandi.