Ўзбекистон мезбонлик қиладиган Осиё кубогига қуръа ташланди
Осиё футбол конфедерацияси 2022 йилги U-23 Осиё кубоги мезбонлигини Ўзбекистонга тақдим этган эди.
Мазкур чемпионатнинг саралаш босқичи учрашувлари учун қуръа ташлаш маросими бугун "Бунёдкор" cтадионида бўлиб ўтди. Унга кўра 46 иштирокчи жамоа Ғарб ва Шарқ минтақаларига бўлинган ҳолда саралаш босқичида қатнашади. Қуръа натижаларига кўра жамоалар 11 та гуруҳда 15 та йўлланма учун кураш олиб борадиган бўлди.
Ўзбекистон U-23 терма жамоаси финал босқичи мезбони сифатида тўғридан-тўғри йўлланмага эгалик қилади. Лекин, шундай бўлса ҳам, ёшлар терма жамоаси саралаш учрашувларида ҳам иштирок этадиган бўлди. Ўзбекистоннинг саралашдаги ўйинлари ўртоқлик ўйини мақомида ўтади. U-23 Осиё кубоги 2022 cаралаш босқичи беллашувлари жорий йилнинг 23-31 октябрь кунлари марказлашган ҳолда ўтказилиши режалаштирилган.
