O‘zbekistonda 2026-yildan boshlab shoshilinch tibbiy yordam xizmatida “Onlayn shifokor” funksiyasi yo‘lga qo‘yiladi. Mazkur tizim aholiga favqulodda holatlarda masofadan turib tezkor tibbiy maslahat olish imkonini yaratadi. Bu haqda Sog‘liqni saqlash vazirligi matbuot xizmati xabar berdi.
Ta’kidlanishicha, yangi xizmat shoshilinch tibbiy yordam bo‘limlarining shifoxona va poliklinikalar bilan integratsiyasini kuchaytirib, qaror qabul qilish jarayonini tezlashtiradi hamda yordam ko‘rsatish sifatini oshiradi. Loyiha sog‘liqni saqlash tizimini raqamlashtirish doirasida amalga oshirilmoqda.
Vazirlik ma’lumotiga ko‘ra, so‘nggi davrda tizimda bir qator samaradorlik ko‘rsatkichlari yaxshilangan. Xususan, 2400 nafar dispetcher maxsus tayyorgarlikdan o‘tgan bo‘lib, natijada manzilga yetib borishdagi kechikishlar 1,1 foizdan 0,3 foizga qisqardi. Tez yordam brigadalarining qo‘ng‘iroqlarga o‘rtacha yetib borish vaqti esa 25–30 daqiqadan 10–15 daqiqagacha kamaygan.
So‘nggi sakkiz yil davomida shoshilinch tibbiy yordam xizmatlari soni 818 tadan 1600 taga, brigadalar soni esa 1600 tadan 2800 taga oshdi. Bir chaqiriq uchun dori vositalari xarajati 750 so‘mdan 11 800 so‘mga yetgan.