“Ўзбекистонда хизмат кўрсатган дипломат” унвони таъсис этилади
Ташқи сиёсат фаолияти концепцияси янгиланади ва унинг устувор йўналишлари қайта кўриб чиқилади.
.
Жаҳонда юз бераётган геосиёсий ўзгаришлар, халқаро муносабатлардаги беқарорлик ва глобал иқтисодий трансформациялар шароитида Ўзбекистон ташқи сиёсатини миллий манфаатлар ва замон талабларига мос равишда доимий янгилаб бориш зарурлиги таъкидланди. Бу ҳақда Президент Шавкат Мирзиёев ўз нутқида қайд этди.
Давлат раҳбарининг айтишича, сўнгги йилларда олиб борилаётган очиқ, прагматик ва мувозанатли ташқи сиёсат натижасида Ўзбекистоннинг халқаро майдондаги ўрни ва нуфузи сезиларли даражада мустаҳкамланди. Шу билан бирга, глобал хавфсизлик архитектурасидаги ўзгаришлар ва янги иқтисодий иттифоқлар ташқи сиёсатда янада фаол ва натижага йўналтирилган ёндашувни талаб қилмоқда.
Шу муносабат билан Ўзбекистон Республикасининг Ташқи сиёсат фаолияти концепциясини янгилаш, унинг устувор йўналишларини қайта кўриб чиқиш ҳамда миллий манфаатларни ҳимоя қилишга қаратилган аниқ вазифаларни белгилаш зарурлиги қайд этилди. Янги концепция иқтисодий дипломатия, хавфсизлик, инвестиция, экспорт, транспорт-логистика, сув ва иқлим масалаларини ўзаро боғлиқ ҳолда қамраб олиши лозим.
Ташқи сиёсат фаолиятини самарали ташкил этиш мақсадида ҳар бир элчихонага йилига қўшимча 100–200 минг доллар маблағ ажратилиши белгиланди. Шунингдек, дипломатлар меҳнатини муносиб эътироф этиш учун “Ўзбекистон Республикасида хизмат кўрсатган дипломат” фахрий унвонини таъсис этиш таклиф этилди.
