“O‘zgidromet” direktori Sherzod Habibullayevning xabar berishicha, 26-28-avgust kunlari O‘zbekiston hududiga nam va salqin havo massalari kirib keladi.
Natijada respublika hududi bo‘yicha 26-27-avgustda shamol tezligi 17-22 metr/sekundgacha kuchayishi kutilmoqda, baʼzi joylarda 23-25 metr/sekundgacha kuchayishi, ayrim joylarda chang-to‘zonlar bilan kuzatilishi mumkin.
Salqin havo massalari kirib kelishi natijasida 27-28-avgust kunlari kunduzi havo harorati 23-28 darajagacha pasayadi.
"26-avgustda respublika shimolida va cho‘l hududlarda, 27-28 avgustda qolgan hududlarda vaqti-vaqti bilan yomg‘ir yog‘adi, momaqaldiroq bo‘lishi mumkin. Tog‘ oldi va tog‘li hududlarda yomg‘ir yog‘adi, baʼzi joylarda kuchli bo‘ladi", — deyiladi xabarda.
Kutilayotgan kuchli yomg‘irlar yog‘ishi hisobiga respublikaning tog‘ oldi va tog‘li hududlarida 27-29-avgust kunlari sel-suv toshqin hodisalari yuzaga kelishi mumkin.
Gidrometeorologiya xizmati tog‘ oldi va tog‘li hududlarda istiqomat qiluvchi fuqarolar, dam oluvchilar hamda tog‘li xududlarda harakatlanuvchi haydovchilardan ehtiyotkorlik choralarini ko‘rishni so‘ragan.