5,5 млрд сўм асоссиз ундирилган: ҳудудий электр тармоқлари корхоналарига иш қўзғатилди
Республика бўйича 965 та ҳолатда тадбиркорлардан электр тармоғига қайта уланиш учун тўлов олингани аниқланган.
Рақобат қўмитаси ҳудудий электр тармоқлари корхоналари томонидан тадбиркорлик субъектларидан электр тармоғига қайта уланиш учун асоссиз тўлов ундирилгани юзасидан иш қўзғатди.
Маълум қилинишича, амалдаги тартибга кўра, электр энергиясидан қарздорлик бартараф этилгач, корхоналарни электр тармоғига қайта улаш учун жарима ва қўшимча тўлов ундириш бекор қилинган. Тегишли ўзгартиришлар электр энергиясидан фойдаланиш қоидаларига ҳам киритилган.
Бироқ Рақобат қўмитасига Бизнес-омбудсман томонидан тақдим этилган маълумотлар таҳлили натижасида 2025 йил 23 августдан 2026 йил февралигача тадбиркорлардан қайта уланиш учун жами 965 та ҳолатда 5,5 млрд сўм ундирилгани аниқланган.
Шу муносабат билан “Ҳудудий электр тармоқлари” АЖ ва унинг тизимидаги корхоналарга нисбатан иш қўзғатилган.
Ҳозирда ҳолатлар манфаатдор давлат органлари иштирокида ўрганилмоқда. Ишни кўриб чиқиш якунлари бўйича қўшимча маълумот берилиши билдирилган.
