Rossiya prezidenti Vladimir Putin 28-yanvar kuni Kreml saroyida Suriya prezidenti Ahmad ash-Sharaa bilan uchrashuv o‘tkazib, uni mamlakat hududiy yaxlitligini tiklash yo‘lidagi ijobiy siljishlar bilan tabrikladi. Putin Suriya hududlarini qayta birlashtirish jarayoni jadallashayotganini qayd etib, Rossiya ushbu yo‘nalishda Damashqni doimiy qo‘llab-quvvatlab kelayotganini ta’kidladi. Bu haqda A News xabar bermoqda.
“Biz Suriya hududiy yaxlitligini tiklash bo‘yicha olib borayotgan sa’y-harakatlaringizni diqqat bilan kuzatib kelmoqdamiz. Bu jarayon tobora tezlashayotganini ko‘rib, sizni tabriklamoqchiman”, dedi Putin. U Rossiya Suriya suvereniteti va hududiy yaxlitligini tiklash tarafdori ekanini yana bir bor tasdiqladi.
Uchrashuvda ikki mamlakat o‘rtasidagi iqtisodiy hamkorlik masalasiga ham to‘xtalib o‘tildi. Putin so‘nggi vaqtlarda savdo-iqtisodiy aloqalar “o‘lik nuqtadan siljiganini” va o‘sish qariyb 4 foizni tashkil etganini aytdi. Uning so‘zlariga ko‘ra, bu ko‘rsatkich kutilgan darajada katta bo‘lmasa-da, ijobiy tendensiyani saqlab qolish muhim.
Shu kuni Kreml matbuot kotibi Dmitriy Peskov Putin va ash-Sharaa Rossiya qurolli kuchlarining Suriyadagi mavjudligi bilan bog‘liq masalalarni ham muhokama qilishini ma’lum qildi. Ahmad ash-Sharaaning bu Moskvaga so‘nggi to‘rt oy ichidagi ikkinchi tashrifi bo‘lib, avvalgi safar 2025-yil oktyabr oyida amalga oshirilgan edi.