Қирғизистонда ўқитувчи ва шифокорлар маоши икки баравар оширилади
Президент Садир Жапаров бюджет соҳалари ходимлари иш ҳақи 100 фоизга оширилишини эълон қилди.
Қирғизистонда таълим ва соғлиқни сақлаш соҳаларида фаолият юритаётган ходимларнинг иш ҳақи 2026 йил 1 апрелдан бошлаб ўртача 100 фоизга оширилади. Бу ҳақда Қирғизистон президенти Садир Жапаров 25 декабрь куни Халқ Қурултойида маълум қилди, деб хабар беради «Фергана» нашри.
Президентнинг айтишича, дастлаб иш ҳақларини 50 фоизга ошириш режалаштирилган, бироқ муҳокамалар якунида президентлик компенсацияси ҳисобидан маошларни икки баравар оширишга қарор қилинган.
Ҳозирда ўқитувчиларнинг ўртача ойлик маоши 26 минг сомни (тахминан 297 доллар) ташкил этади. 2026 йил 1 апрелдан кейин бу кўрсаткич 52 минг сомга (594 доллар) етади. Ўқитувчиларнинг иш ҳақи уларнинг маълумоти, иш стажи, малака тоифаси, фаолият юритаётган ҳудуди, ўқитаётган фани ва ҳафталик юкламасига қараб белгиланади.
Хусусан, шаҳар мактабларида эндигина фаолиятини бошлаган, тажрибасиз ёш ўқитувчига 36 800 сом (420 доллар) миқдорида иш ҳақи белгиланади. Минтақавий коэффитсиенти 1,8 бўлган чекка тоғли ҳудудда 30 йилдан ортиқ тажрибага эга математика ўқитувчисининг маоши 97 600 сомга (1116 доллар) етади.
Тиббиёт соҳасида эса ҳозирда шифокорларнинг ўртача иш ҳақи 31 500 сомни (360 доллар) ташкил этмоқда. 2026 йил 1 апрелдан бошлаб бу кўрсаткич 62 500 сомга (614 доллар) ошади. Натижада шифокорларнинг соф маоши ўртача 50 минг сомни (570 доллар) ташкил этади.
Президентнинг таъкидлашича, шаҳарларда иш фаолиятини эндигина бошлаган шифокор 35 500 сом (406 доллар) олади. Олис тоғли ҳудудларда 30 йиллик тажрибага эга юқори малакали шифокорларнинг ойлиги 75 700 сомгача (865 доллар) етади.
Бундан ташқари, ижрочилар ва мураббийларнинг ҳам иш ҳақлари оширилади. Ижрочиларнинг ўртача маоши 20 700 сомдан 39 000 сомгача, мураббийларнинг солиқлардан кейинги даромади эса 45 000 сомгача етади.
Шунингдек, 2026 йил 1 апрелдан бошлаб ҳар бир лавозим учун 5 000 сом (57 доллар) миқдорида президентлик компенсацияси жорий этилиши ҳисобига техник ва хизмат кўрсатувчи ходимларнинг иш ҳақи ўртача 80 фоизга оширилади.
