Qirg‘iziston prezidentining chegaradosh viloyatlardagi vakolatli vakillari va O‘zbekistonning chegaradosh viloyatlari hokimlari kengashining to‘rtinchi yig‘ilishi doirasida M.Bayetov nomidagi umumtaʼlim maktabining ochilishi bo‘lib o‘tdi.
Maktabning ochilish marosimida Qirg‘iziston Vazirlar Mahkamasi raisi Aqilbek Japarov va Bosh vaziri Abdulla Aripov videokonferensaloqa orqali ishtirok etdi.
Qirg‘iziston Vazirlar Mahkamasi Raisi mazkur maktabning ochilishi ikki xalq o‘rtasidagi buyuk do‘stlik ramzi ekanini taʼkidladi.
"Ikki davlat o‘rtasidagi ikki tomonlama hamkorlik rivoji ko‘p yillik tarixiy qardoshlik, do‘stlik va yaxshi qo‘shnichilik rishtalari samarasidir. Botken viloyati O‘zbekistonning Farg‘ona viloyati bilan chegaradosh va biz o‘zaro manfaatli barcha sohalarda transchegaraviy hamkorlikni kengaytirish tarafdorimiz. O‘zbekiston rahbariyatiga Botken viloyatida ushbu taʼlim muassasasini qurishda ko‘rsatgan yordami uchun minnatdorchilik bildiraman. Bugungi tadbir birodarlik rishtalarimiz yana-da mustahkamlanib, rivojlanib borayotganidan dalolatdir", — dedi Oqilbek Japarov.
O‘z navbatida, Bosh vazir Abdulla Aripov bu kabi tadbirlar orqali ikki qardosh xalq o‘rtasidagi do‘stlik yana-da mustahkamlanishini taʼkidlab, Qirg‘iziston Respublikasiga tinchlik va farovonlik tiladi.
Eslatib o‘tamiz, maktab qurilishi bo‘yicha kelishuvga Qirg‘iziston prezidenti Sadir Japarovning 2021 yil 11-12 mart kunlari O‘zbekistonga tashrifi chog‘ida Prezident Shavkat Mirziyoyevning shaxsiy tashabbusi bilan erishilgan edi.
330 o‘rinli yangi maktab binosi qurilishi 2021 yil iyul oyida boshlangan edi. Loyihaning smeta qiymati 3,5 million AQSH dollarini tashkil etib, ushbu pullar O‘zbekiston tomonidan ajratilgan.