Buxoro viloyati Qorako‘l tumanida joylashgan o‘quv markazlaridan birida abituriyentlar zaharlangani haqidagi xabarlarga viloyat Sog‘liqni saqlash boshqarmasi munosabat bildirdi. Avvalroq ijtimoiy tarmoqlarda va OAVda 11-yanvar kuni tongda 20 nafar abituriyent zaharlanish alomatlari bilan shifoxonaga olib kelingani haqida xabarlar tarqalgan edi.
Rasmiy ma’lumotga ko‘ra, Qorako‘l tumani Hojalar MFY, Ulug‘bek ko‘chasida joylashgan “Ilm nuri” MCHJga qarashli o‘quv markazida tahsil olayotgan 20 nafar abituriyentda noma’lum modda ta’siridan zaharlanish holati aniqlangan. Xabar kelib tushishi bilan ular zudlik bilan tuman tibbiyot birlashmasiga yetkazilgan.
Holat yuzasidan viloyat Sog‘liqni saqlash boshqarmasi boshlig‘i Elyor Oltiyev boshchiligida ishchi guruh tuzilib, voqea joyida zarur choralar ko‘rilgan. Bemorlar belgilangan tibbiy standartlar asosida UTT, rentgen va laborator tekshiruvlardan o‘tkazilgan. Shuningdek, viloyatdan 10 nafar toksikolog va reanimatolog jalb etilib, Respublika shoshilinch tibbiy yordam ilmiy markazi mutaxassislari bilan onlayn konsilium o‘tkazilgan.
Ko‘rilgan tibbiy choralar natijasida barcha 20 nafar abituriyentning ahvoli yaxshilangan va ular ambulator davolanish uchun uyiga javob berilgan. Har bir bemorga oilaviy shifokor va patronaj hamshirasi biriktirilgan. Hozirda ularning ahvoli qoniqarli, shikoyatlar yo‘q. Qon namunalarining ekspertiza natijalari bo‘yicha qo‘shimcha ma’lumot berilishi ma’lum qilindi.