Qoraqalpog‘iston Respublikasining Xo‘jayli tumanida is gazidan zaharlanish oqibatida uch kishi vafot etdi. Bu haqda tuman hokimligi matbuot xizmati ma’lum qildi.
Ma’lum bo‘lishicha, 13-dekabr kuni “Samanko‘l” OFY Qamissholi aholi punkti Faxriylar ko‘chasida joylashgan ijaradagi uyda yashab kelgan fuqaro A.J. uyini isitish maqsadida qo‘lbola isitish pechini o‘zboshimchalik bilan boshqa xonaga ko‘chirgan hamda uni mo‘risiz holda gaz tarmog‘iga noqonuniy ravishda ulagan.
Mazkur holat oqibatida xonada gaz yonishidan hosil bo‘lgan tutun — is gazi to‘planib, fuqaro A.J. va uning ikki nafar nabirasi kuchli zaharlangan. Natijada 2011-yilda tug‘ilgan A.S. (8-sinf o‘quvchisi) va 2015-yilda tug‘ilgan A.Q. (4-sinf o‘quvchisi) hamda fuqaro A.J. voqea joyida vafot etgan.
Tuman hokimligi marhumlarning oilasiga ijtimoiy yordam ko‘rsatilayotganini bildirdi. Mazkur holat yuzasidan hozirda tergovga qadar tekshiruv ishlari olib borilmoqda.