Maʼlum qilinishicha, 2022 yil 15 iyun kuni soat 06:45 da Qozog‘iston Respublikasi Favqulodda vaziyatlar vazirligidan olingan maʼlumotga ko‘ra, bugun, 15 iyun kuni Qozog‘iston vaqti bilan soat 03:10 da Jambul oblasti Jambul rayonidan o‘tuvchi “Almata-Toshkent” avtomobil yo‘lining 545 km. da Qozog‘iston Respublikasi “Qizil tan” qishlog‘idan 7 km uzoqlikda trikotaj mahsulotlari ortilgan yuk mashinasida yong‘in chiqqan. Oqibatda, avtomobil yo‘lida tirbandlik yuzaga kelganligi natijasida soat 03:40 larda “Almata-Toshkent” yo‘nalishida harakatlanayotgan yuk mashinasi 2 ta yo‘lovchi tashish avtobusi va 1 ta yengil avtomobil bilan to‘qnashuvgan. To‘qnashuv oqibatida ushbu avtotransport vositalarida yong‘in kelib chiqqan.
Yong‘in sodir bo‘lgan avtobuslarning birida 31 nafar O‘zbekiston Respublikasi fuqarolari bo‘lgan va ulardan 3 nafari o‘rta darajada tan jarohati bilan Taraz shahar tibbiyot maskaniga olib borilgan. Hozirda ushbu fuqarolarga malakali tibbiy yordam ko‘rsatilmoqda.
Shuni alohida taʼkidlash joizki, Do‘st Qozog‘iston masʼullari yuzaga kelgan mazkur baxtsiz hodisa oqibatlarini zudlik bilan bartaraf etish, jarohatlanganlarga tez tibbiy yordam ko‘rsatishda yaqindan ko‘mak berishmoqda.
Holat yuzasidan Qozog‘iston Respublikasi Favqulodda vaziyatlar vazirligi bilan maʼlumot almashinuvi davom etmoqda.