Шахмат бўйича халқаро турнирда етакчилар сараланмоқда

 

16 август куни пойтахтимиздаги Халқаро шахмат академиясида старт олган халқаро гроссмейстер Георгий Агзамов хотирасига бағишланган ўн тўртинчи анъанавий халқаро мусобақада 3-тур ўйинлари ортда қолди. Бу ҳақда Туризм ва спорт вазирлиги матбуот хизмати хабар берди.

 

Эътиборлиси, дунёнинг 12 та давлатидан 150 нафар ақл-идрок соҳиблари қатнашаётган ушбу мусобақанинг «А» гуруҳида ҳозирча ҳамюртимиз Нодирбек Абдусатторов мағлубиятсиз одимламоқда. Турнирнинг 1- рақамли иштирокчиси  Абдусатторов 3-турда қора доналарда ўйнаганига қарамай беларуслик Кирилл Спивакни мағлуб этди. Мусобақада ғолибликка асосий даъвогарлардан бири арманистонлик Шант Саргисян ҳам ҳозирча 100 фоизлик натижа қайд этиб турибди.

 

У 3-турда озарбайжонлик халқаро гроссмейстер Мурадли Муҳаммад устидан ғалаба қозонди. Шунингдек, ҳозирча яна бир арманистонлик шахматчи Тигран Арутунян ҳамда Эрон  вакили Ариан Голами ҳам 3 ўйиндан 3 очко жамғарган ҳолда етакчилар сафида бормоқда. Ёш, умидли шахматчимиз Ҳумоюн Бекмуродовнинг 2,5 очко билан 5-8-ўринлардан жой олиб турганлиги таҳсинга лойиқ. Ҳамюртларимиздан Нодирбек Ёқуббоев ҳамда Бобир Сатторов ҳам худди шунча очко жамғарган.

 

Жамшид Амиров