Шимолий Корея қора оққуш гўшти ёрдамида очликка қарши курашмоқчи
Ҳукумат бу орқали одамлар ҳаётини яхшилашга ва очликдан қутқаришга умид қилмоқда.
Бу ҳақда "Daily Mail" хабар қилди.
Унда айтилишича, ҳозирда мамлакат шарқида бу турдаги қушларни саноат усулида етиштириш бошланган. Ҳукумат бу орқали одамлар ҳаётини яхшилашга ва очликдан қутқаришга умид қилмоқда. Амалдорлар унинг гўштини “шифобахш” ва “мазали” деб баҳоламоқда.
— “Қора оққуш гўштида бошқа ҳайвонлар гўштига нисбатан кўпроқ оқсил бор, у тез ҳазм бўлади ва саратонга қарши хусусиятларга эга”, – деб таъкидлаган КХДР қишлоқ хўжалиги вазирлиги ходими.
Пхеньян 2019 йилдаёқ қора оққуш етиштиришни режалаштирган. Бу режани амалга ошириш Ким Чен Ин фуқароларни 2025 йилгача, яъни Хитой билан чегаралар очилгунга қадар камроқ овқатланиши зарурлигини эълон қилганидан сўнг тезлашди.
КХДР коронавирус пандемияси туфайли 2020 йилнинг январида Хитой билан чегарани тўлиқ ёпди. Бу мамлакат иқтисодиётига салбий таъсир қилди: озиқ-овқат товарларига нархлар кескин кўтарилиб кетди.
Бундан аввал Жанубий Корея разведкаси Ким Чен Ин саломатлиги тўғрисида маълумот берганди. Шунингдек, Шимолий Корея сувости кемаларидан баллистик ракета учиргани хабар қилинганди.
