Sirdaryo viloyati Sirdaryo tumanida isteʼmolga yaroqsiz va sifatsiz go‘sht mahsulotlari aniqlandi, deya xabar bermoqda viloyat IIB axborot xizmati.
Qayd etilishicha, Sirdaryo tumanida joylashgan YPX maskanida Сobalt avtomashinasi to‘xtatilib tekshirilganda transport vositasining salon va yukxonasida isteʼmolga yaroqsiz 250 kilogramm mol go‘shti borligi aniqlangan.
Maʼlum bo‘lishicha, fuqaro mazkur go‘sht mahsulotlarini Qashqadaryo viloyatidan Toshkent shahriga sotish uchun olib kelayotgan bo‘lgan.
Shundan so‘ng holat yuzasidan O‘zbekiston Respublikasi Hayvonlar kasalliklari tashxisi va oziq-ovqat mahsulotlari xavfsizligi davlat markaziga tekshirish maqsadida hujjatlar taqdim etilib, qonuniy tartibda jazo qo‘llash uchun ish Bosh prokuratura huzuridagi Iqtisodiy jinoyatlarga qarshi kurashish departamenti Guliston shahar bo‘limiga yuborilgan.