Tehron shahrida havo judayam ifloslangani tufayli maktab va universitetlar yopilgan hamda masofaviy taʼlim rejimi joriy qilingan. Bu haqida mahalliy nashrlar xabar bermoqda.
Shuningdek, favqulodda, tibbiyot, operatsiya, harbiy va huquqni muhofaza qilish xizmati xodimlaridan tashqari, davlat va xususiy sektor xodimlariga uydan turib ishlash imkoniyati berilgan.
Bundan tashqari, Tehron va uning atrofida soat 06:30 dan 20:30 gacha transport harakati cheklangan. Yuk tashuvchi transport vositalarining harakati taqiqlangan, faqat tez buziluvchi mahsulot yoki yoqilg‘i tashuvchi transportlar uchun istisno qilingan.
Qayd etilishicha, agar Eron poytaxtida havo sifati yaxshilanmasa, cheklov choralari yana-da kuchaytirilishi va uning amal qilish muddati uzaytirilishi mumkin.