Тиббиёт олийгоҳи талабалари учун вазир стипендияси таъсис этилди
Унинг миқдори Ибн Сино номидаги давлат стипендияси миқдорига тенглаштирилган.
Ўзбекистондаги тиббиёт олий ўқув юртлари талабалари учун “Соғлиқни сақлаш вазири стипендияси” таъсис этилди. Бу хақда ССВ матбуот хизмати хабар берди.
Қайд этилишича, бу ҳақда вазирнинг тегишли буйруғи қабул қилинган. Унга кўра, мазкур стипендия бакалавриат ва магистратура босқичида таҳсил олаётган ёшларга берилади.
Стипендия ҳар бир тиббиёт олий таълим муассасасининг 5 нафаргача номзодига бир йил мобайнида ажратилади. Номзодларни саралаш ҳақидаги эълон танлов ўтказилишидан камида 1 ой олдин матбуотда эълон қилинади.
Номзодлар томонидан аризалар мавжуд 11 та тиббиёт олий ўқув юртининг “Ёшлар билан ишлаш, маънавият ва маърифат бўлими”га тақдим этилади. Ҳужжатлар навбатдаги босқичда вазирликнинг Фан ва таълим бошқармаси томонидан кўриб чиқилгач, вазир буйруғи асосида берилади.
