O‘zbekiston Ichki ishlar vazirligi va Davlat xavfsizlik xizmati xodimlari tomonidan olib borilgan tezkor tadbirlar natijasida Tojikiston va Qirg‘izistondan giyohvandlik vositalarini olib kirish bilan shug‘ullangan transchegaraviy jinoiy guruh faoliyatiga chek qo‘yildi.
Tergov ma’lumotlariga ko‘ra, guruh faoliyatini 28 yoshli ayol muvofiqlashtirib kelgan. U Farg‘ona viloyatining Dang‘ara tumanida, 36 va 51 yoshli sheriklari bilan birga omborxonadan yirik miqdordagi afyun (opiy)ni olib ketmoqchi bo‘lgan vaqtida qo‘lga olingan.
Tekshiruv jarayonida Qo‘qon–Toshkent avtomobil yo‘li bo‘yidagi dalaga ko‘milgan to‘rtta polietilen paketda jami 4 kilogramm opiy moddasi topilib, daliliy ashyo sifatida musodara qilindi.
Shuningdek, tergov davomida qo‘lga olingan ayol ilgari ham narkotik moddalar bilan bog‘liq jinoyatlar uchun javobgarlikka tortilganligi aniqlangan.
Mazkur holat yuzasidan O‘zbekiston Respublikasi Jinoyat kodeksining 246-moddasi (kontrabanda) hamda 273-moddasi 5-qismi (giyohvandlik vositalarini o‘tkazish maqsadida qonunga xilof tayyorlash, saqlash va tarqatish) bo‘yicha jinoyat ishi qo‘zg‘atildi.
Ayni paytda jinoiy guruhning boshqa a’zolarini aniqlash va ularni javobgarlikka tortish bo‘yicha tezkor-qidiruv choralari davom ettirilmoqda.