Davlat xavfsizlik xizmati va Bosh prokuratura huzuridagi Iqtisodiy jinoyatlarga qarshi kurashish departamenti tomonidan o‘tkazilgan tezkor tadbirlar natijasida sog‘liqni saqlash, energetika va ta’lim sohalarida faoliyat yurituvchi bir nechta mansabdor shaxs poraxo‘rlik bilan qo‘lga olindi.
Toshkent viloyati Sog‘liqni saqlash boshqarmasining mas’ul xodimi maxsus tibbiy ta’minot bazasida saqlanayotgan tibbiyot buyumlarini soxta hujjatlar orqali sotishga uringan. U xaridor bilan 57 880 AQSh dollariga kelishib, oldindan 40 000 AQSh dollari olgan vaqtida ashyoviy dalillar bilan qo‘lga olindi. Ushbu shaxsga nisbatan Jinoyat kodeksining 167-moddasi 3-qismi “a” bandi va 209-moddasi 1-qismi bilan jinoyat ishi qo‘zg‘atilib, qamoq ehtiyot chorasi qo‘llanildi.
Jizzax viloyatida “Hududiy elektr tarmoqlari” AJning Jizzax filiali Sharof Rashidov tumani elektr ta’minoti bo‘limi bosh muhandisi “Energosavdo” korxonasi tuman bo‘limi nazoratchisi bilan til biriktirib, yakka tartibdagi tadbirkorning M-39 xalqaro avtomagistral yo‘li bo‘yida joylashgan yer maydoniga elektromobillarni quvvatlantirish shoxobchasi tashkil etishiga ruxsat berish evaziga 90 million so‘m olgan vaqtida ushlandi. Ularga nisbatan Jinoyat kodeksining 214-moddasi 3-qismi “v, g” bandlari bo‘yicha jinoyat ishi qo‘zg‘atilib, tergov harakatlari olib borilmoqda.
Jizzax viloyatida o‘tkazilgan yana bir tezkor tadbir davomida Namangan shahridagi umumta’lim maktablaridan birining direktor o‘rinbosari abituriyentlarga oliy ta’lim muassasalariga kirishda kimyo va biologiya fanlaridan milliy sertifikat olish bo‘yicha imtihon savollari va javoblarini mansabdor tanishlari orqali yetkazib berish evaziga 20 000 AQSh dollari talab qilgani aniqlandi. U 8 000 AQSh dollari va 156 million so‘m olgan vaqtida qo‘lga olindi. Ushbu shaxsga nisbatan Jinoyat kodeksining 25, 168-moddasi 4-qismi “a” bandi bilan jinoyat ishi qo‘zg‘atilgan.