Тошкентда соврин жамғармаси 120 минг долларлик турнир ўтказилади

Бу Ўзбекистон тарихида бу энг юқори мукофот жамғармасига эга шахмат турнири ҳисобланади

11-16 ноябрь кунлари пойтахтимизда шахмат бўйича Ўзбекистон Президенти соврини учун халқаро турнир бўлиб ўтади.

Ҳозирда мусобақада дунёнинг 10 дан ортиқ давлатидан таниқли гроссмейстерлар иштирок этиш истагини билдирган. Жумладан, таниқли ўзбекистонлик гроссмейстер Рустам Қосимжонов, Санан Сюгирова, Максим Чигаев, Павел Панкратов, Михаил Кобали, Вадим Звягинтсев, Максим Матлаков (Россия), Шант Саркисян (Арманистон), Эҳсан Гаем Магами (Эрон), Вячеслав Зарубитский (Беларус), Ханс Ниеманн (АҚШ), Александр Моисеэнко, Антон Ситников, Виктор Дмитренко, Дмитрий Мишчук (Украина) каби нуфузли шахматчилар иштирок этиши кутилмоқда.

11 ноябрь куни иштирокчилар блитс, 13, 14 ва 16 ноябрь кунлари эса икки турдан иборат баҳсларга киришади. Мусобақада FIDE рейтингида 2021 йил 1-октабр ҳолатига кўра, 1800 ва ундан юқори балл тўплаган эркак шахматчилар ҳамда ушбу рейтингда 1600 ва ундан юқори балл тўплаган аёл шахматчилар иштирок этишлари мумкин.