Qurilish va uy-joy kommunal xizmat ko‘rsatish vaziri Sherzod Hidoyatov Jahon banki mutaxassislari tomonidan o‘tkazilgan tadqiqot natijalariga tayangan holda, Toshkent shahrida olib borilayotgan qurilish ishlari zarrachalar bilan havo ifloslanishining 6 foiziga sabab bo‘lganini ma’lum qildi.
Mazkur ma’lumot poytaxtda ekologik vaziyatni yaxshilash bo‘yicha tashkil etilgan maxsus komissiya tomonidan ham tasdiqlangan.
Vazirning ta’kidlashicha, mutaxassislar qurilish loyihalarining atrof-muhitga salbiy ta’siri 6 foizni tashkil etishini aniqlagan. Ushbu ko‘rsatkichni nol darajaga tushirish maqsadida aniq harakatlar rejasi ishlab chiqilgan bo‘lib, bu yo‘nalishdagi ishlar allaqachon boshlangan.
Sherzod Hidoyatov so‘nggi oylarda Toshkent shahridagi qurilish jarayonlariga qo‘yiladigan ekologik xavfsizlik talablari sezilarli darajada kuchaytirilganini qayd etdi. Xususan, yirik qurilish maydonlarida maxsus suv purkagichlar va chang yig‘ish moslamalaridan foydalanish majburiy etib belgilangan. Ushbu uskunalarning o‘rnatilishi va samarali ishlashi tegishli idoralar tomonidan qat’iy nazorat qilinmoqda.
Shahar bo‘ylab chang tarqalishini kamaytirish maqsadida qurilish loyihalarini shamol yo‘nalishini inobatga olgan holda rejalashtirishga alohida e’tibor qaratilmoqda. Qurilish kompaniyalari belgilangan standartlarga qat’iy rioya etishi shartligi, mas’ul idoralar esa vaziyatni doimiy monitoring qilib borishi va qoidabuzarliklarga tezkor choralar ko‘rishi ta’kidlandi.