Учта вилоятда ўқишга киритувчи фирибгарлар аниқланди
Тезкор тадбирлар давомида 6000 минг АҚШ доллари ва 22 млнлик коррупцион ҳолат фош бўлган.
Ўқишга киритиб қўйиш билан боғлиқ фирибгарлик ҳолатлари фош этилди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Қайд этилишича, Департамент ҳамда ДХХнинг Наманган вилояти бошқармалари томонидан ўтказилган тезкор тадбирда фуқаро О.Э. фуқаро А.нинг танишини Наманган давлат университетининг жисмоний маданият факултетига ўқишга киритиб қўйиш эвазига 4 000 АҚШ доллари ва 22 млн сўмни олган вақтида ашёвий далиллар билан ушланган.
Департаментнинг Самарқанд шаҳар бўлими томонидан ўтказилган тезкор тадбирда фуқаро Х. Н. бошқа бир фуқаро Ж.ни Самарқанд давлат универитетига ўқишга киритиб қўйиш эвазига 2000 АҚШ долларини олган вақтида қўлга тушган.
Шунингдек, ИИБ ходимлари билан ҳамкорликда Когон шаҳрида ўтказилган тезкор тадбирда фуқаро Н. Э. фуқаро М.ни 1500 АҚШ доллари эвазига танишлари орқали Бухоро шаҳридаги Жамоат саломатлиги техникумига ўқишга киритиб қўйишни ваъда қилиб, олдиндан 400 АҚШ долларини олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
