Украинадаги вазият ЕИни парчалаши мумкин — Bloomberg
Можаро Европадаги интеграция жараёнларининг камчиликларини кўрсатиб бергани қайд этилган.
Украинадаги вазият Европа Иттифоқининг сиёсий ва иқтисодий парчаланишига олиб келиши мумкин. Бу ҳақда америкалик таҳлилчи Клайв Крук Bloomberg агентлигига ёзган мақоласида тахмин қилди.
“Ҳозирча Европа босими остидаги янги бирликдан хурсанд бўлишга ҳали эрта. Иттифоққа қўйилаётган талаблар уни ё кучайтиради, ё парчаланишига олиб келади”, – деган эксперт.
Крук ЕИнинг Россия-Украина можаросига муносабати кўпчиликни ҳайрон қолдирганини қайд этди. Бу Россияга қарши санкцияларда, Украинага қурол етказиб беришда, шунингдек, мудофаага харажатларнинг оширилишида ҳамда Швеция ва Финляндиянинг НАТОга аъзоликка интилишида яққол намоён бўлди.
“Шу билан бирга бу каби чораларни мустаҳкамлаш Евроиттифоқдан одатдагидан кучли сиёсий бирлик талаб қилади”, – деб таъкидлаган у.
Муаллифнинг фикрича, Европа давлатларида кузатилаётган турли даражадаги инфляция иқтисодий интеграция масаласида ҳали кўп ишлар қилиниши кераклигини кўрсатади. Бу айниқса, энергетика соҳасига тааллуқли. Бундан ташқари, хавфсизликка янгича ёндашув зарур.
“Россия-Украина низоси ЕИдан бирлашишни талаб қилди. Аммо РФга қарши санкциялар Европага янада кучли зарба беради. Айрим давлатларга зарба бошқаларига қараганда сезиларли бўлади”, – деб фикрига якун ясаган Крук.
Аввалроқ Япония Россияга қарши янги санкциялар жорий этганди.
