Хивада ўз қизига уятсиз хатти-ҳаракат қилган эркак судланди
Шунингдек, қизнинг амакаси унга ўлдириш билан таҳдид қилган.
Хоразм вилоятининг Хива туманида ҳимоя ордери талабларини бажармаган ота ва амакига маъмурий қамоқ жазоси тайинланди. Бу ҳақда Олий суд матбуот хизмати хабар берди.
Хива туманида яшовчи вояга етмаган Н.Қ.га ИИБ томонидан тазйиқ ва зўравонликдан жабрланган хотин-қизлар учун бериладиган ҳимоя ордери берилган. Шунга қарамай, ичкиликни касб қилган отаси ва амакиси унга руҳий зўравонлик ўтказишда давом этган.
Жабрланувчи судга мурожаат қилиб, отаси унга нисбатан уятсиз хатти-ҳаракатлар қилишни, ҳақоратлашни давом эттираётганини ва амакиси жанжал кўтариб, ўлдиришини айтиб таҳдид қилганлигини маълум қилган.
Жиноят ишлари бўйича Хива туман судида томонлар ва гувоҳларнинг кўрсатмаси эшитилиб, қарор қабул қилинган. Унга кўра, Ш. Қодиров ва Ж.Қодировга 5 сутка маъмурий қамоқ жазоси тайинланган. Шунингдек, маъмурий қамоқнинг ҳар бир куни учун базавий ҳисоблаш миқдорининг 15 фоизи қийматида қамоқ харажатлари ундирилиши белгиланган.
