Ерда кучли магнит бўрони бошланди
Магнит бўрони бир ҳафта давом этиши кутилмоқда.
Ерда кучли магнит бўрони кузатилмоқда ва олимларнинг ҳисоб-китобларига кўра, бу ҳодиса камида бир ҳафта давом этади.
Маълум қилинишича, бўроннинг интенсивлиги 9 баллик шкала бўйича 7 баллга етиб, геомагнит фаолликнинг жиддий даражасидан дарак бермоқда.
NOAAнинг Космик об-ҳавони башорат қилиш маркази (SWPC) маълумотларига кўра, бундай бўронлар К-индекс орқали 0 дан 9 гача бўлган шкала бўйича баҳоланади. Прогнозларга кўра, 31 мартдан 2 апрелгача магнит бўрон айниқса кучайиши мумкин.
Олимлар март ва апрель ойининг бошларида Қуёш фаоллиги янада ортишини кутмоқда, бу эса янги геомагнит бўронларнинг пайдо бўлиш эҳтимолини оширади.
Магнит бўрон – Қуёшдан чиқадиган зарядланган заррачалар оқими натижасида Ер магнит майдонининг бузилишидир. Бу заррачалар сайёрамизга етиб келгач, магнитосферада тебраниш ва ўзгаришларни келтириб чиқаради.
