Янги мавсумда янги трансферлар: ким қанчага баҳоланди?
Август ойидан Европада футбол мавсумига старт берилди.
Бугунги кунда Англия, Испания ва Германия чемпионатларида иккинчи тур ўйинлари ўтказилаётган бўлса, Францияда учунчи тур ўйинлари якунига етди. Италия А Cериясида эса 1-тур ўйинлари бўлиб ўтмоқда. Футбол жамоалари ушбу мавсумда бир қатор трансферларни амалга оширди. Ушбу футболчилар мавсум давомида мухлислар диққат-эътиборида бўлиши шубҳасиз.
Жек Греалиш («Астон Вилла» дан «Манчестер Сити» га, 117 миллион евро)
Ушбу харид ёзнинг энг қиммат трансферидан бири бўлди. Амалдаги Англия чемпиони «Манчестер Cити» Жек Греалишни 117 миллион еврога сотиб олди. Ярим ҳимоячи узоқ вақтдан бери «Астон Вилла» таркибида ўйнаб келаётганди. У бир неча мавсум бу клубда сардорлик вазифасини бажарди. Грилиш яқинда ўтказилган Европа чемпионатида Англия терма жамоасининг финалга чиқишга ёрдам берди. Жек Греалиш энди 25 ёшга тўлди. Унинг учун барча имконият ҳали олдинда, деб бемалол айтиш мумкин. Греалиш «Cити» таркибида Премьер лигада аллақачон дебют қилишга улгурди. 1-турда «Тоттенхем» билан ўйин омадсиз якунланганди. Аммо иккинчи турда Жек Греалиш биринчи голини уришга муваффақ бўлди. Ушбу ўйинда «Манчестер Cити” «Норвич» устидан » 5:0 ҳисобида ғалаба қозонди.
Ромелу Лукаку («Интер» дан «Челси» га,115 миллион евро)
Бельгиялик ҳужумчи биринчи марта Лондонга бундан ўн йил олдин келганди. У вақтда футболчи жуда ёш бўлгани учун жамоада ўз ўрнини топа олмади. Лондон клубида омади кулмаган Лукаку «Эвертон» клубига ўтди. У ерда жамо ўйинига ижобий таъсир кўрсата олди. Ёрқин ўйинлари кўплаб клублар қизиқишига сабаб бўлди. Шундан сўнг ҳужумчи «Манчестер Юнайтед» клуби билан келишувга эришди. Ўшанда Манчестер энг қиммат трансферлардан бирини амалга оширди. Аммо у ерда мураббий ва раҳбарият билан боғлиқ вазият туфайли жамоадан кетишга мажбур бўлди. Шундан сўнг футболчи 2019 йилда «Интер» жамоаси билан шартнома имзолади. У “Милан”да Европанинг энг яхши 5 та ҳужумчиси сафидан ўрин олди. Орадан кўп ўтмай Европа чемпионлар лигаси ғолиби бўлган «Челси» унга таклиф билан чиқди ва ёзги трансфер ойнасида футболчи лондонликлар сафига келиб қўшилди. Лукакунинг трансфери инглизларга 115 миллион еврога тушди. Хабарларга кўра, бельгиялик Лондонда ҳар мавсумда 15 миллион евро ишлаб топади. Бу сумма унинг «Интер»да олган пулининг ярмини ташкил қилади. Шундан кўриниб турибдики Италия ҳамон Англияга молиявий томондан рақобатчи эмас. Премьер-лиганинг биринчи турида «Челси» ўз уйида «Кристал Пелас»ни Лукакусиз мағлуб этди. Аммо иккинчи турнинг асосий ўйинида футболчи «Арсенал» дарвозасига тўп киритишга эришди.
Вараннинг трансфери июль ойи охирида эълон қилинди. Шартнома эса икки ҳафтадан сўнг имзоланди. У 14 августда расман «Манчестер Юнайтед» футболчисига айланди ва мухлисларга «Лидс»га қарши ўйиндан олдин таништирилди. Аммо футболчи бу ўйинда қатнашмади. Варан «Реал Мадрид»да 10 мавсум ўйнади. У шу йиллар давомида тўртта Чемпионлар лигаси кубоги ва клуб даражасидаги бошқа совринларни қўлга киритди. Ҳимоячининг «Реал» билан шартномаси якунланишига ҳали бир йил бор эди. Аммо у янги шартнома имзолашни истамади. Шу тариқа у «Манчестер Юнайтед» билан келишувга эришди. Манчестер клуби 28 ёшли футболчини 48 миллион еврога сотиб олди. Менимча бу ушбу ёзда амалга оширилган энг муваффақиятли трансферлардан бири эди.
Родриго Де Пол («Удинеза»дан «Атлетико»га, 35 миллион евро)
Премьер лигада энг қиммат трансфер 100 миллион евродан ошган бўлса, Испанияда бунинг тескарисини кўришимиз мумкин. Мадриднинг «Атлетико» клуби Родриго Де Полни 35 миллион еврога сотиб олди. Де Полнинг футболдаги фаолияти Греалишникига ўхшайди. Аргентиналик «Удинезе»да бир қанча ёрқин ўйинлар намойиш қилди. Терма жамоа сафида шу ёзда Америка кубогини қўлга киритди. Мутахассисларнинг фикрича, Родриго Диего Симеоне услубига жуда мос келади. Агар шу режа иш берадиган бўлса, «Атлетико» чемпионлик пойгасида «Барса» ва «Реал» билан қўрқмасдан рақобат қила олади.
Давид Алаба («Бавария» дан «Реал» га, эркин агент)
Испан клублари ғайриоддий техникага эга футболчиларга кўпроқ қизиқади. Алаба ана шундай футболчилар сирасига киради. Австриялик футболчи фаолиятининг кўп қисмини «Бавария»да ўтказди, бир қанча совринларни қўлга киритди. «Реал Мадрид» футболчининг шартномаси тугашини кутди ва уни “Мюнхен” клубидан олиб келди. «Реал Мадрид» чемпионатни яхши бошлади. Биринчи турда «Алавес»ни мағлуб этди. Алаба дебют ўйинини ўтказди. Футболчи 90 дақиқа давомида майдонда тинмай ҳаракат қилди. Битта голга ассистентлик қилди.
Мемфис Депай («Лион»дан «Барселона»га, эркин агент)
«Барселона» бош мураббийи Роналд Куман жамоада Мемфис Депайни кўришни жуда хоҳлаган эди. Шу тариқа голландиялик футболчи каталонияликлар сафига қўшилди. Депай футбол мухлисларига яхши таниш. Ҳучумчи фаолиятини Голландиянинг «ПСВ» клубида бошлади. У “ЖЧ -2014” да ажойиб ўйин кўрсатди. Шундан сўнг уни «Манчестер Юнайтед» сотиб олди. Англиядаги муваффақиятсиз фаолиятидан кейин Франциянинг «Лион» клубига ўтди. У ерда ҳужумчи босимларсиз, эркин ўйнай бошлади ва жамоанинг асосий футболчисига айланди. Депай ҳозир 27 ёшда. Унинг «Барса» сафида совринга эга бўлиш эҳтимоли юқори. Мемфис «Барса»даги дебютини «Реал Соседад»га қарши учрашувда бошлади. У ўйинда Жерар Пике узатмасини голга айлантира олди.
Лионел Месси («Барселона»дан «ПСЖ»га, эркин агент)
Каталония клуби билан барча совринга эга бўлган футболчи 5 август куни «Барса» билан янги шартнома бўйича келишувга эриша олмаганидан кейин Франциянинг «ПСЖ» клуби билан икки йиллик келишувга эришди. Кутилмаган воқеадан кейин мухлислар Мессининг «ПСЖ» сафидаги биринчи ўйинини интиқлик билан кутмоқда. Аргентина термаси билан Америка кубоги соҳиби бўлган фулболчининг ҳали тўлиқ жисмоний тайёргарликка эга эмаслиги сабабли дебют ўйини кечикмоқда. Ҳозирда «ПСЖ» чемпионат доирасида учта ўйинда тўққиз очко жамғариб турнир жадвалининг биринчи поғонасида бормоқда.
Жамшидбек Амиров
