«АрМИ — 2021»: ўзбек ҳарбийлари учинчи марта ғолиб бўлди
Марказий ҳарбий округнинг «Фориш» тоғ полигонида «Халқаро армия ўйинлари» доирасида «Ҳарбий-тиббий эстафета» мусобақасининг сўнгги шарти — «Жамоавий биринчилик» беллашуви бўлиб ўтди.
«Жамоавий биринчилик» шартига кўра, иштирокчилар муҳандислик тўсиқларидан эмаклаб ўтиб, шартли ярадорга биринчи тиббий ёрдам кўрсатиш, уни тиббий замбил ва арқон ёрдамида сувли тўсиқ устидан олиб ўтиш, санитар ҳарбий техникага жойлаштириш, барча аслаҳаларни йиғиштириб, хавфсиз ҳудудга олиб чиқиш каби машқларни бажарди.
Иштирокчилар шартли равишда жанг майдонига айлантирилган махсус йўлакларда ўз маҳоратини намойиш қилди.
Якуний натижаларга кўра, эркаклар ва аёллар баҳсида Ўзбекистон жамоаси биринчи ўринга эгаллади.
Ўзбекистон Мудофаа вазирлиги жамоаси бу йил ҳам мусобақанинг «Жамоавий биринчилик» босқичида янги рекорд қайд этди. Мазкур шартни эркаклар 5 дақиқа 28,4 сония (ўтган йил – 6ʻ28,8), аёллар эса 7 дақиқа 51,3 сония (ўтган йил – 10ʻ09,2) ичида бажаришга муваффақ бўлди.
Барча шартлардаги умумий натижага кўра, биринчи ўринни Ўзбекистон Мудофаа вазирлиги жамоаси, иккинчи ўринни Россия Федерацияси, учинчи ўринни эса Хитой Халқ Республикаси жамоаси эгаллади.
Эслатиб ўтамиз, мазкур мусобақада ҳамюртларимиз 3 йилдан буён ғолибликни қўлдан бермай келяпти.
Мақсаджон Обиджонов
