МДҲ ўйинларининг илк совриндорлари тантанали кутиб олинди
Қозон шаҳрида давом этаётган I МДҲ ўйинларида 20 та медаллар жамланмасини қўлга киритган боксчиларимиз ва 11 та совринга мушарраф бўлган белбоғли кураш бўйича Ўзбекистон ўсмирлар терма жамоаси аъзолари кеча тунда Ўзбекистонга қайтиб келди.
Мамлакатимиз белбоғли курашчилари Қозонда ўтказилган ўйинларда 4 та олтин, 1 та кумуш ва 6 та бронза медалини қўлга киритиб, жамоалар ўртасида 2-ўрин соҳиби бўлди.
Юртимиз боксчи қизлари эса 11 та (3 та олтин, 6 та кумуш ва 2 та бронза), ўғил болалар 9 та (4 та олтин, 3 та кумуш ва 2 та бронза) медалга сазовор бўлиб, умумжамоа ўртасида 2-ўринни қўлга киритди.
Спортчиларимиз пойтахтимиздаги Ислом Каримов номидаги халқаро аэропортда Ўзбекистон белбоғли кураш ва бокс федерациялари вакиллари, ота-оналар ва кенг жамоатчилик иштирокида тантанали кутиб олинди.
Аввалроқ I МДҲ ўйинларида белбоғли курашчиларимиз 11 та медаль билан умумжамоа ҳисобида биринчи бўлишгани ҳақида хабар берилганди.
