Икер Касиляс Дубайда дарвозабонлар тайёрлаш марказини очмоқчи
«Реал» ва Испания терма жамоалари собиқ дарвозабони Икер Касиляс ўзининг биринчи дарвозабонларни тайёрлаш марказини ишга туширмоқчи.
У «Икер Касиляс» дарвозабонларни тайёрлаш маркази деб номланади. Мазкур марказ Бирлашган Араб Амирликларининг Дубай шаҳрида қурилади. Лойиҳа Амирлик Спорт кенгаши томонидан маъқулланган.
«Спорт — менинг ҳаётим. У менга ўзим истаган барча нарсани берди. Шунинг учун иқтидорли дарвозабонлар тайёрлайдиган марказни ишга туширмоқчиман. Марказ нафақат дарвозабон, балки ёш футболчилар қобилиятини ҳам ривожлантиришга хизмат қилади.», — деди футболчи.
Марказда бошқа давлатлардан келган болалар ҳам тарбияланади. Шунингдек, бу ерда дарвозабонлар учун мураббийлар тайёрлаш режалаштирилган.
Касиляс лойиҳаси “Реал Мадрид"нинг собиқ ҳимоячиси Мишел Салгадо асос солган «Фурсан Ҳиспаниа» футбол мактаби билан ҳамкорликда ишлайди.
