Фабио Капелло: "Челси”га гол уриш осон бўлмайди
Россия терма жамоасининг собиқ мураббийи Фабио Капелло Чемпионлар лигаси гуруҳ босқичининг биринчи туридан ўрин олган "Челси" ва "Зенит" жамоалари ўртасидаги баҳс ҳақида ўз фикрини билдирди.
Италиялик мутахассиснинг сўзларига кўра, Санкт-Петербург жамоасини "Стемфорд Бридж"да ўта қийин сафар кутиб турибди.
“Лондоннинг "Челси" клуби Европанинг энг кучли жамоаси саналади. "Зенит" эса аутсайдер. "Челси"нинг «АПЛ» доирасидаги сўнгги ўйинини эътибор билан кузатдим. Таркиб ҳам, ўйин ҳам кучли. Бу учрашувда, менимча, "Зенит"га ҳеч қандай имконият қолмайди. "Челси"га гол уриш осон бўлмайди”, — дейди собиқ бош мураббий.
Маълумот учун, Чемпионлар лигаси 1-тур баҳсидан ўрин олган "Челси" ва "Зенит" ўртасидаги учрашув Тошкент вақти билан 00:00да бошланади.
Эслатиб ўтамиз, бундан аввал "ПСЖ"нинг "Брюгге"га қарши қайдномаси тақдим этилган эди.
Мақсаджон Обиджонов
