Кобулга ракета зарбалари даҳшатли хато бўлган — Пентагон раҳбари
АҚШ Афғонистонга берган ракета зарбаси тинч аҳоли ўлимига олиб келганини тан олди. Бу ҳақда "Спутник Афганистан" хабар бермоқда.
АҚШ жорий йилнинг 29 август куни Кобул аэропорти яқинида дронлар орқали ракета зарбалари берганди. Вашингтон ўшанда зарбалар ИШИД террорчисига берилганини иддао қилган. Аммо 17 сентябрь куни ҳужум оқибатида тинч аҳоли вакиллари ҳалок бўлганини тан олди.
АҚШ қуролли кучлари марказий қўмондонлиги бошлиғи Кеннет Маккензи ҳодисадан қаттиқ афсусда эканини маълум қилган. Шунингдек, барча оқибатлар учун жавобгарликни тўлиқ зиммасига олган. Маълум бўлишича, ракета зарбалари 10 фуқаро (уларнинг 7 нафари болалар)нинг умрига зомин бўлган. Пентагон раҳбари Ллойд Остин буни “даҳшатли хато” деб атади.
26 август куни Кобул аэропортидаги теракт ортидан Жозеф Байден АҚШ ҳарбийларига террорчиларга президент рухсатисиз ҳам зарба беришга ижозат берди. Шундан кейин Пентагон Афғонистоннинг турли вилоятларида ИШИД марраларига ракета зарбалари берган. 30 август кунги хужум ҳам дастлаб террорчиларга қарши қаратилгани айтилган. Аммо кейинчалик зарба оқибатида тинч аҳоли вакиллари, шунингдек, АҚШ гуманитар ташкилотининг кобуллик ходими ҳалок бўлгани аниқланди.
Маълумот ўрнида: 15 август куни “Толибон” ҳаракати Кобулни эгаллаган. 31 августда АҚШ Афғонистонни тўлиқ тарк этди. Ҳаракат томонидан эгалланмаган ягона ҳудуд — Панжшер вилояти эди. Аммо 6 сентябрда ушбу ҳудуд ҳам “Толибон” назоратига ўтди. Шундан кейин толиблар 7 сентябрь куни мамлакатнинг янги ҳукумати тузилаганини эълон қилди.
Эслатиб ўтамиз, аввалроқ Панжшер қаршилик кучлари раҳбари Аҳмад Масъуд Вашингтонда лоббист ёллагани хабар қилинган эди.
Жаҳонгир Қўзиев
