«Соғлом турмуш тарзи» платформаси фаолияти тўхтатилганига оид хабар асоссиз бўлиб чиқди
Хабарингиз бор, «Соғлом турмуш тарзи» платформаси давлатимиз раҳбарининг «Соғлом турмуш тарзини кенг татбиқ этиш ва оммавий спортни ривожлантириш чора-тадбирлари тўғрисида»ги 6099-сонли фармони ҳамда Вазирлар Маҳкамасининг «Соғлом турмуш тарзи» платформаси фаолиятини ташкил этиш чора-тадбирлари тўғрисида«ги 253-сонли қарорига мувофиқ йўлга қўйилган эди.
Туризм ва спорт вазирлигининг спорт йўналишидаги сайтида ушбу мобил илова фойдаланувчиларига пул тўлаш вақтинча тўхтатилгани ҳақида хабар берилди, бироқ ахборот хизмати ходими мақолада асоссиз ва тасдиқланмаган маълумот бергани боис аҳоли орасида бу борада тушунмовчилик пайдо бўлган.
Мазкур платформа бўйича жорий йил 10 июндан 13 сентябрга қадар бир сутка давомида ўн минг ва ундан ортиқ қадам юрган 18 ёш ва ундан юқори ёшдаги Ўзбекистон Республикаси фуқароларининг платформадаги электрон ҳамёнига жами 9,4 миллиард сўм тўлаб берилган.
Шу билан бирга, ҳар ойда ҳар бир туман (шаҳар) бўйича энг кўп пиёда юрган шахсга - 300 минг сўмдан, ҳар бир ҳудуд бўйича энг кўп пиёда юрган шахсга - 500 минг сўм, республика бўйича энг кўп пиёда юрган шахсга қўшимча равишда 1 миллион сўм фойдаланувчиларнинг электрон ҳамёнига ўтказиб берилди. Жорий йилнинг июнь-август ойлари давомида эса жами 206,7 миллион сўм маблағ тўланди.
Ҳозирги пандемия даврида аҳоли орасида соғлом турмуш тарзини тарғиб қилиш ҳамда унга риоя қилиш жуда муҳим. Платформага оид хабарнинг ОАВ ва аҳоли орасида бу қадар кенг тарқалиши унга бўлган қизиқишнинг юқори эканини ва платформа яратиш қарори қанчалик тўғри бўлганини яна бир бор тасдиқлайди.
Туризм ва спорт вазирлиги ахборот хизмати мазкур хабарни етказишда хатоликка йўл қўйгани учун узр сўради, “Соғлом турмуш тарзи" платформаси ишлашда давом этишини эълон қилди. Аҳолини чалғитувчи хабар берган ходимга эса огоҳлантириш берилгани маълум қилинди.
Аввалроқ Осиё ўйинларида киберспорт бўйича медаллар ўйналадиган йўналишлар тасдиқлангани ҳақида хабар берган эдик.
Жамшид Амиров
