Ўзбекистонда гипермаркет ва супермаркет мақомида иккита дўкон очилади
Қозоғистонда энг йирик чакана савдо тармоғи ҳисобланадиган “Magnum Cash & Carry” Ўзбекистонда 2021 йилнинг декабрь ойи бошида иккита дўкон очади. Бу ҳақда компания бошқаруви раиси Азамат Осмонов “K21:Kazakhstan Growth Forum”ида маълум қилди, деб хабар беради “Kapital.kz”.
Ташкилот раисининг сўзларига кўра, бу дўконлар гипермаркет ва супермаркет мақомида бўлади.
У, шунингдек, “Magnum Cash & Carry” тармоғи учун Ўзбекистон бозорига кириш устувор вазифа эканини айтган. Чунки рус савдо маркалари Қозоғистон бозорида устунлик қилаётгани, улар билан маҳаллий чакана сотувчилар имконияти тенг эмаслигини таъкидлаган.
Ўзбекистон бозорига чиқиш режалари ўтган йилнинг кузида маълум бўлган эди. Маълумотларга кўра, компания 2021 йилда Тошкентда олтита дўкон очишни режа қилган бўлиб, ҳар бир жой учун инвестициялар ҳажми 5 миллион долларни ташкил этади.
Компания харидорларга бошқа мамлакатлардан олиб келинадиган ҳамда Ўзбекистон ва Қозоғистонда ишлаб чиқариладиган кенг турдаги товарларни таклиф қилишни мақсад қилган. Шу билан бирга, савдо тармоғи “Magnum Club” бонус дастурини ҳам ишга туширмоқчи.
Оламгир Абдиев
