Футзал бўйича жаҳон чемпионатининг барча чорак финалчилари маълум бўлди
Литвада ўтаётган футзал бўйича жаҳон чемпионатида 1/8 финал баҳслари якунланди.
Кеча Испания — Чехия, Португалия ва Сербия термалари иштирокида сўнгги ўйинлар бўлиб ўтди. Унда дунёнинг энг кучли жамоалари ҳисобланадиган Испания ҳамда Португалия термалари ғалаба қозонди. Шу тариқа чорак финал йўлланмасини қўлга киритган барча жамоалар номи маълум бўлди.
Жаҳон чемпионатининг 1/4 босқичидан ўрин олган ўйинлари 26 сентябрдан старт олади. Ушбу баҳсларни Марокаш ва Бразилия ўртасидаги беллашув бошлаб беради. Шу куни яна ўтган жаҳон чемпионати финалчилари Россия ҳамда Аргентина жамоалари майдонга тушади.
27 сентябрь куни эса Португалия — Испания, Эрон — Қозоғистон термалари иштирокида ўйинлар бўлиб ўтади. Мазкур баҳсларда ғалаба қозонган жамоалар яримфинал йўлланмасига эга бўлади.
Эслатиб ўтамиз, аввалроқ Ўзбекистон футзал терма жамоаси Эронга 8:9 ҳисобида мағлуб бўлгани ҳақида хабар берганди.
Жамшидбек Амиров
