Бу йил докторантура имтиҳонлари анъанавий тарзда ўтказилади
Бу йилги докторантура имтиҳонлари онлайн эмас, одатдагидек, анъанавий тарзда бўлиб ўтади. Бу ҳақда Инновацион ривожланиш вазирлиги ахборот хизмати раҳбари Назокат Абдуқундузова брифингда маълум қилди.
Мутахассиснинг айтишича, докторантурага кириш имтиҳонлари ва суҳбат жараёнларини видео кузатув шаклида (онлайн трансляция тарзида) ўтказиш чоралари кўрилади.
Таянч докторантурага кириш имтиҳонлари бўйича топшириладиган биринчи фан умумий балининг тенг ярмидан, яъни 50 фоизидан кам балл тўплаган талабгорлар кейинги босқичга ўтказилмайди. Бу фан мустахассислик ёки чет тилига оид бўлади.
Шунингдек, брифингда мавзуга оид саволларга жавоб берилди. Жумладан:
Бир таянч докторант ўз йўналишидан бошқа йўналишга "перевод" қилиши мумкинми?
Таянч докторантурага кириш имтиҳонларидаги саволлар бир ихтисосликдан бошқа ихтисосликка тўғри келмаганлиги сабабли кўчириш мумкин эмас.
Мустақил тадқиқотчи бўлган изланувчи таянч докторантурага ўқишга топшириши мумкинми?
Норматив-ҳуқуқий ҳужжатларда мустақил изланувчиликка расмийлаштирилган шахс таянч докторантурага ҳужжат топшириши мумкин ёки мумкин эмаслиги тўғрисида нормалар берилмаган. Шу сабабли ҳужжат топширишда мустақил изланувчиликка расмийлаштирилган илмий ёки таълим ташкилотларининг рухсатига асосан топшириш мақсадга мувофиқ.
Стажёр-тадқиқотчиликда ўқийман. Илмий мақолаларим ва ишим деярли тайёр бўлиб қолган. Докторантурага киришга менда имтиёз борми?
Стажёр-тадқиқотчилик ишлаб чиқаришдан ажралган ҳолда тегишли ихтисослик бўйича илмий ва илмий-ижодий изланишларни олиб бориш, шунингдек, фалсафа доктори илмий даражасини олиш учун изланувчини тайёрлаш шакли ҳисобланиб, ушбу шаклда ўқиган шахсга ҳеч қандай имтиёз берилмайди.
Эслатиб ўтамиз, бундан аввал “Эл-юрт умиди” жамғармаси 272 ўринли стипендия танловини эълон қилгани ҳамда Зангиота туманида университет очилиши ҳақида хабар берилганди.
Оламгир Абдиев
