Чавандозларимиз Миллатлар кубоги финалида қатнашиш учун Испанияга жўнаб кетди

 

 

Миллатлар кубоги от спорти дунёсида Олимпия ўйинларидан кейин турувчи нуфузли мусобақа саналади. Халқаро от спорти федерацияси (ФEИ) барча миллий федерацияларни жойлашувига кўра саралаш босқичлари ўтказиладиган 7 та минтақага ажратди ва улар орасидан якуний турнирга энг кучли 18 та жамоа (1 та жамоада 4 та чавандоз) йўлланма олди. Кубок финали ҳар йили кузда Испанияда бўлиб ўтади.

 

Маълумот учун: от спорти бўйича энг қадимий турнирлардан бири бўлган Миллатлар кубоги Европа мамлакатларида 1909 йилдан буён ўтказилади. Халқаро от спорти федерацияси 1930 йилдан  унинг асосий ташкилотчисига айланди. "Миллий ғурур, халқаро шижоат" Миллатлар кубогининг шиори этиб белгиланди. Ташкилотчилар бу шиор турнир руҳини яққол ифодалайди, дея ҳисоблайди. Миллатлар кубоги аввал Қиролича кубоги, Президент кубоги ва  Шаҳзода Филипп кубоги номлари билан ҳам аталган.

 

Таъкидлаш жоиз, республикамизда от спортининг конкур тури кенг ривожланган. Шу боис чавандозларимиз учун ФEИ Миллатлар Кубоги финалига чиқиш энг юксак орзу эди. Ҳар йили апрель ойида чавандозларимиз шахсий ҳисобда Жаҳон кубоги йўлланмаси учун минтақамиз вакиллари билан баҳслашади.

 

2020 йил охиридан бошлаб вазият ўзгарди. От спорти бўйича Ўзбекистон миллий терма жамоаси янги ташкил этилган Евроосиё йилқичилик ва от спорти ассоциациясига қўшилди. 2021 йил 21-25 апрель кунлари Тошкент вилоятининг "Универсал Жумпинг Агро" от спорти клубида от спорти бўйича халқаро мусобақа – "FEI Jumping Nations Cup Euratsian League" турнири бўлиб ўтди. Унда Ўзбекистон жамоавий баҳсда 1-ўринни қўлга киритди.

 

Испанияда ўтказиладиган мусобақада Ўзбекистон терма жамоаси таркибида Баҳромжон Газиев, Умид Комилов, Бекзод Қурбонов, Аъзам Толиббоев каби чавондозларимиз иштирок этади. Унда Бельгия, Бразилия, Канада, Франция, Буюк Британия, Германия, Ирландия, Италия, Нидерландия, Норвегия, Испания, Швеция, Швейцария, АҚШ ва Ўзбекистондан келган чавандозлар беллашади.

 

 

Жамшидбек Амиров