Турк ва ҳинд киноижодкорлари билан ижодий кеча ташкил этилди

 

 

Ушбу кечада таниқли турк киноюлдузлари Ўзжан Дениз, Мелиса Памук, Сефа Зенген, Дилан Дениз каби туркиялик актёр ва актрисалар иштирок этишди. Ташриф буюрган меҳмонларга ўзбек ва турк маданияти акс этган концерт дастури тақдим этилди.

 

Шунингдек, пойтахтдаги Алишер Навоий номидаги киносаройда ҳинд меҳмонлари иштирокида махсус шоу-концерт  ҳам ташкил этилган. 

 

Саҳнага Ҳиндистон делегациясида юртимизга ташриф буюрган Митҳун Чакраборти, Бомани Ирани, Кунал Капур, Наваб Шоҳ, Рандҳир Капур ва бошқа киноюлдузлар чиқиб ўз таассуротларини ўртоқлашишди. 

 

Агентликнинг бош директори Фирдавс Абдухолиқов ҳамда ҳинд актёри Рандҳир Капур бошчилигида афсонавий ҳинд киноюлдузи Раж Капурнинг бюсти олиб чиқилди. Мазкур бюст Капурлар сулоласининг ўзбек халқига ҳурмати рамзи сифатида тақдим этилди.

 

Ижодий кеча "Жаҳон мамлакатлари киноси кунлари" доирасида ташкил этилган бўлиб, фестиваль доирасида яна Россия, Ҳиндистон каби бир нечта давлатларнинг ҳам кино кунларига старт берилди.

 

Аввалроқ Ўзбекистон кинематография агентлиги Россия, Тожикистон, Қозоғистон давлатлари билан келишувга эришилди. Шунингдек, Никита Михалков ОАВ вакиллари билан учрашди ҳамда италиялик Франко Неро кино ҳақидаги ўз фикрларини айтганди.

 

Чўлпоной Аҳмедова