Оҳангаронда низо: ЙПХ ходими билан фуқаро нега тортишди?
2021 йил 1 октябрь куни Тошкент вилояти Оҳангарон тумани ҳудудидан ўтувчи А-373а "Олмалиқ-Тошкент" автомобиль йўлининг 1-километрида ЙПХ ходими билан фуқаро ўрасида низоли вазият келиб чиққан. Бу ҳақда Йўл ҳаракати хавфсизлиги бош бошқармаси хабар берди.
Унда айтилишича, ЙПХ ходими А.Караев томонидан "KIA CARNIVAL" русумли автомобиль тўхтатиб текширилганда, транспорт воситасининг ён ойнаси рухсатиз қорайтирилганлиги аниқланган. Шундан сўнг ЙПХ ходими "Ўзбекистон Республикаси Маъмурий жавобгарлик тўғрисида"ги Кодекснинг 126-моддасига мувофиқ баённома расмийлаштираётган вақтда автомобиль йўловчиси ҳамда атрофда бўлган яна бир пиёда телефон орқали юз берган ҳолатни видеотасвирга олган.
ЙПХ ходими йўловчига тасвирга олмасликни сўраган. Бу эса ўзаро низога айланиб кетган.
“Мазкур ҳолат юзасидан Тошкент вилояти ИИББ ЙҲХБ масъул ходимлари томонидан хизмат текшируви ўтказилмоқда. Текширув давомида ЙПХ ходимининг хатти-ҳаракатларига ҳуқуқий баҳо берилади”, – деб таъкидлаган Йўл ҳаракати хавфсизлиги бош бошқармаси.
Бундан аввал ЙПХ ходими тўхтатганда автомобиль салонида ўтирган ҳайдовчи нима қилиши кераклиги, Олмалиқда ЙПХ ходимига "Қора Малибу"ни қўйиб юборишни буюрган командирга чора кўрилгани ҳамда Тошкентда “Lacetti” ҳайдовчиси ЙПХ ходимига бўйсунмасдан қочиб кетгани ҳақида хабар берилганди.
Оламгир Абдиев
