Бекободда “Реал Мадрид” футбол академияси очилди
Тошкент вилоятининг Бекобод шаҳрида “Реал Мадрид” клубининг футбол академияси иш бошлади.
Ушбу футбол академиясида барча шарт-шароит мавжуд: ўйин майдонлари, ётоқхона, ўқув бўлими ва замонавий ошхона. У ерда 11 ёшдан 17 ёшгача бўлган 7 та ёш тоифасида футболчилар тайёрланади. Академияда ўқув-машғулотлари “Реал Мадрид” футбол клуби анъаналарига мос равишда олиб борилади. Машғулотлар учун табиий ва сунъий футбол майдонлари, фитнес машғулотлари учун мўлжалланган иншоотлар бунёд этилган.
Мазкур академиянинг очилиш маросимда “Реал Мадрид” футбол клубининг афсонавий собиқ футболчиси Алваро Арбелоа иштирок этди ҳамда унга қабул қилинган ёш футболчиларга ўз маҳорат ва тажрибасини намойиш қилди.
Аввалроқ Реал Мадрид собиқ футболчисининг Ўзбекистонга келиши ва Икер Касильяс Дубайда дарвозабонлар тайёрлаш марказини очмоқчи эканлиги ҳақида хабар берилганди.
Жамшидбек Амиров
