Ўзбекистонда "Sputnik V" вакцинаси ишлаб чиқарила бошланди
“Jurabek Laboratories” МЧЖ қўшма корхонасида ишлаб чиқарилаётган "Sputnik V" вакцинаси 1- ва 2- компонентларининг дастлабки 260 500 дозаси Санитария-эпидемиологик осойишталик ва жамоат саломатлиги хизматига топширилди.
Аввалроқ Ўзбекистонда "Jurabek Laboratories" компанияси "Спутник V" вакцинасини ишлаб чиқариши ҳақида хабар берган эдик. Мазкур вакцина Гамалея илмий-тадқиқот маркази томонидан маъқулланган.
Бу юртимизда тайёрланаётган иккинчи вакцина бўлиб, бундан аввал ушбу корхонада жами 7 миллион доза ZF-UZ-VAC2001 вакцинаси ишлаб чиқарилган. Унинг 1 458 820 дозаси эмлаш учун топширилган эди.
Соғлиқни сақлаш вазирлиги ахборот хизмати хабарига кўра, Ўзбекистонга эмлаш жараёнларида фойдаланилаётган жами вакцина 28 473 528 дозани ташкил қилмоқда.
Улардан:
1 594 480 дозаси AstraZeneca,
21 958 488 миллион дозаси ZF-UZ-VAC2001,
720 500 дозаси "Sputnik V",
3 000 060 дозаси Moderna,
1 200 000 дозаси Pfizer/BioNTech вакцинасидир.
Шундан 22 721 129 дозаси эмлаш жараёнларида қўлланилган бўлиб, 5 226 139 нафар аҳоли коронавирусга қарши барча босқичларда тўлиқ эмланди.
Маълумот учун, вакциналар ишлаб чиқарилганидан сўнг, уларнинг ҳар бир сериясидан намуналар яна Россияга текширув учун юборилади. Гамалея илмий-тадқиқот маркази ушбу намуналарни маъқуллаганидан сўнггина, вакциналар эмлаш учун етказиб берилади.
Эслатиб ўтамиз, май ойида Россиянинг "Sputnik V" вакцинасини Ўзбекистонда ишлаб чиқаришни йўлга қўйиш бўйича келишувга эришилгани маълум қилинганди.
Бундан аввал Ўзбекистонга "Sputnik V" вакцинасининг навбатдаги партияси келтирилиши, Ўзбекистон вакцина захираси бўйича МДҲ мамлакатлари орасида етакчи бўлгани ҳамда “Sputnik V”ни қабул қилиш оралиғи ва унинг иккинчи компонентлари қачон келтирилиши маълум бўлгани ҳақида хабар берилганди.
