"Биз келажак учун жавобгармиз!"
Ўзбекистон Экологик партияси Халқаро медиа-холлда сайловга тайёргарлик жараёнлари ва амалга оширилган ишлар хусусида маълумот берди.
Шу йилнинг 24 октябрь куни мамлакатимизда муҳим сиёсий жараён — Ўзбекистон Республикаси Президенти сайлови бўлиб ўтади. Айни кунларда ушбу муҳим сиёсий тадбирга қизғин ҳозирлик кўрилмоқда. Бугун, 18 октябрь куни Халқаро медиа-холлда Ўзбекистон Экологик партияси Ўзбекистон Республикаси Президенти сайловига тайёргарлик жараёнлари ва амалга оширилган ишлар хусусида маълумот берди.
Партия ушбу сайловда илк маротаба иштирок этмокда. Партия раиси ўринбосари Саидрасул Сангинов берган маълумотга кўра, айни кунда Экопартиянинг 14 та ҳудудий ҳамда 207 та туман ва шаҳар партия ташкилотлари фаолият олиб бормоқда.
Экологик партия 2019 йилда ўтказилган парламент сайловида қатнашиб, Олий Мажлис Қонунчилик палатасида 15 та, халқ депутатлари маҳаллий Кенгашларда 600 дан ортиқ депутатлик ўрнига эга бўлган. Ҳозирда партия аъзолари сони 500 мингдан ортиқ. Партиянинг бош шиори — "Биз келажак учун жавобгармиз!"
2021 йил 27 август куни партиянинг навбатдан III — съездида Ўзбекистонда президентлик сайловида иштирок этиш ва Президент лавозимига партия раҳбари Нарзулло Обломуродовни номзод кўрсатиш тўғрисида қарор қилинди.
Партиянинг Марказий сайлов штаби, 14 та ҳудудий сайлов штаби ҳамда туман ва шаҳарлардаги сайлов штаблари сайлов кампаниясини уюшқоқлик билан ўтказишда таянч тузилмалар вазифасини бажармоқда.
Бугунги кунгача номзод ва унинг ишончли вакиллари томонидан жойларда 300 дан ортиқ учрашув ўтказилди. Уларда 65 мингдан зиёд сайловчилар қамраб олинди.
Учрашувларда номзод ва унинг ишончли вакилларига сайловчилар томонидан 250 дан ортиқ таклиф ва тавсиялар берилди.
Фаоллар томонидан барча ҳудудларда номзодни халқ орасида тарғиб этиш, унинг сайловолди дастурини сайловчиларга тушунтириш ишлари ташкил қилиниб, ўтказилган тарғибот-ташвиқот тадбирлари ОАВларда кенг ёритиб борилмоқда.
Шуни алоҳида қайд этиш зарурки, сайловолди ташвиқот ишлари учун барча сиёсий партиялар номзодларига тенглик тамойили асосида шароит яратиб берилди: бепул эфир вақти ҳамда матбуот нашрларидан бепул саҳифалар ажратилди. Партия бу имкониятлардан самарали фойдаланишга ҳаракат қилмоқда.
Муножат Валиева
