Иштихонда коронавирусга қарши курашган тиббиёт ходимларига 275 миллион сўмлик устамалар тўлаб берилмаган
Самарақанд вилоятининг Иштихон туманида коронавирус инфекциясига қарши курашган тиббиёт ходимларининг устамалари тўлаб берилмагани аниқланди.
Тегишли ҳуқуқий ҳужжатларга кўра, тиббиёт, санитария-эпидемиологик ва бошқа ходимлар коронавирус инфекцияси тарқалишига қарши курашиш тадбирларига жалб қилинадиган даврда уларнинг ойлик лавозим маошига 6 фоиз миқдорида ҳар кунлик қўшимча тўловлар ҳам жорий қилинган.
Президентнинг 2020 йилдаги “Коронавирус пандемияси ва глобал инқироз ҳолатларининг иқтисодиёт тармоқларига салбий таъсирини юмшатиш бўйича биринчи навбатдаги чора-тадбирлар тўғрисида”ги фармонида мазкур устама кўзда тутилган.
Туман адлия бўлими томонидан мазкур ҳужжат ижроси ўрганилганида коронавирусга қарши кураш тадбирларига жалб этилган туман СЭО ва ЖС (Санитария-эпидемиологик осойишталик ва жамоат саломатлиги) бўлими ходимларига 2021 йил май-июнь ойларида жами 275 805 479 сўм олти фоизлик қўшимча тўловлар ходимларнинг ойлик иш ҳақига қўшиб тўлаб берилмаганлиги аниқланди. Бу ҳақда туман адлия бўлими бош маслаҳатчиси Акбар Жовлиев маълум қилган.
Юқоридагиларга кўра, туман адлия бўлимининг 2021 йил 23 июлдаги тақдимномасига асосан, СЭО ва ЖС бўлимининг 65 нафар ходимига 275 805 479 сўм 6 фоизлик қўшимча тўловлар тўлаб берилиши таъминланган.
Аввалроқ Президент Шавкат Мирзиёев пандемия шароитида фидокорона меҳнати билан юртдошларимизнинг фидокорона меҳнати билан қийинчиликларни енгиб ўтаётган шифокорларни эътироф этгани ҳамда Паст-дарғомда тиббиёт ходимларига тажовуз қилинган шахс қамоққа олингани ҳақида хабар берилганди.
Баҳринисо Мадумарова
